திக் திக் நிமிடங்கள்

Moorthy Kalluppatti ‘ த லாஸ்ட் கிங் ஆஃப் ஸ்காட்லாண்ட்’ என்ற ஆங்கிலத் திரைப்படத்தில் , உகாண்டா சர்வாதிகாரி இடி அமீனின் இரும்புப் பிட...



த லாஸ்ட் கிங் ஆஃப் ஸ்காட்லாண்ட்’ என்ற ஆங்கிலத் திரைப்படத்தில், உகாண்டா சர்வாதிகாரி இடி அமீனின் இரும்புப் பிடியிலிருந்து நாயகன் தப்பித்துச் செல்வதை க்ளைமாக்ஸில் சுவாரஸ்யமாகக் காட்டியிருப்பார்கள். இந்தியப் பெருங்கடலின் ஒரு தீவில், இரக்கமற்ற ஒருவனின் பிடியிலிருந்து நான் தப்பித்த அந்தக் கடைசி கணங்கள் இப்பொழுது நினைத்தால் புன்னகையை வரவழைக்கக் கூடியது.
செஷல்ஸ் என்பது கிட்டத்தட்ட நூற்றுப் பதினைந்து தீவுகளை அடக்கிய, இந்து மகா சமுத்திரத்தில் அமைந்திருக்கும் ஒரு தீவுக்கூட்ட நாடு. வரலாற்றின்படி, அந்த தீவுகளுக்கென்று பூர்வகுடிகள் எவரும் கிடையாது. 
மத்திய காலகட்டத்தில் கடற்கொள்ளையர்கள் அங்கே அவ்வப்பொழுது ஒதுங்கி ஓய்வெடுப்பது வழக்கம். பதினாறாம் நூற்றாண்டிலிருந்து ஐரோப்பியர்கள் இந்தியப் பெருங்கடலில் தங்கள் ஆதிக்கத்தை நிலைநிறுத்துவதற்காக அடிக்கடி முட்டிக் கொண்டார்கள். அவர்கள் செஷல்ஸ் தீவுகளையும் தங்கள் பிடிக்குள் கொண்டு வந்து, அதன் பெரும்பகுதியை ஆங்கிலேயர்களும், சிறு பகுதியை பிரெஞ்சுக் காரர்களும் பிரித்துக் கொண்டார்கள். 
ஜீன்ஸ் படத்தின் பாடல்களை, வைரமுத்து செஷல்ஸ் தீவுகளில் தங்கியிருந்துதான் எழுதினார். செஷல்ஸ் குடிமக்களில் தொண்ணூறு சதவிகிதத்திற்கும் மேற்பட்டவர்கள் கலப்பினத்தவர். ஐரோப்பிய-ஆப்பிரிக்கக் கலப்புதான் பெரும்பகுதி என்றாலும், ஐரோப்பிய-இந்திய, ஆப்பிரிக்க-இந்திய, ஐரோப்பிய-சீன, ஆப்பிரிக்க-சீன கலப்புகளும் இருக்கிறார்கள். சுற்றுலாவினால் பெரும் பணத்தை ஈட்டும் நாடு என்பதால், அங்கே போதை வஸ்துக்களை விற்பவர்களும் விலைமகள் பெண்டிரும் தங்குதடையின்றிக் காணப்பட்டார்கள்.
செஷல்ஸ் மிக சுதந்திரமான கலாச்சாரத்துடன், தனிமனிதர் நடத்தை மீதான சமூக அழுத்தங்கள் அவ்வளவாக இல்லாத ஒரு நாடு. 
உயர் வகுப்புப் பெண்கள் சற்று நாகரிகமான உடைகள் அணிந்தாலும், நடுத்தர மற்றும் உழைக்கும் வர்க்கப் பெண்கள் உடலின் பெரும்பகுதி வெளியே தெரியும் விதமான ஆடைகளையே அணிவார்கள். ஆண்களில் கிட்டத்தட்ட அனைவருமே அரைக்கால் சட்டையும் டி-ஷர்ட்டும் அணிந்திருப்பார்கள். போதையில் சுற்றித் திரியும் ஆண்கள் அரைக்கால் சட்டை மட்டுமே அணிந்திருப்பார்கள். 
அவர்களைச் சொல்லிக் குற்றமில்லை. அந்த நாட்டின் வெப்ப நிலையும் காற்றில் மிகுந்துள்ள ஈரப்பதமும் வியர்வையைப் பெருக்கி உடலை நனைப்பவை. செஷல்ஸில் முக்கால்வாசி ஜோடிகள் திருமணம் செய்து கொள்ளாமலேயே சேர்ந்து வாழ்பவர்கள். ‘இனி நீயின்றி என்னால் வாழ முடியாது’ என்ற நிலையில்தான் திருமணம் செய்து கொள்வார்கள். சில ஜோடிகள் பேரக்குழந்தைகள் பிறந்த பின்னர் கூட திருமணம் செய்து கொள்கிறார்கள்.
இரண்டாண்டுகளுக்கு முன்பு, ஒரு மாத காலத்திற்கு அங்கே தங்கியிருந்து பணி செய்ய செஷல்ஸுக்குச் சென்று இறங்கினேன். எங்களது வாடிக்கையாளர் அந்த நாட்டின் டாப் டென் பணக்காரர்களில் ஒருவன். நல்ல முறையில் என்னை வரவேற்று எனக்குத் தேவையான அனைத்து வசதிகளையும் செய்து கொடுத்தான். அவனுக்கு ஒரு மனைவியும் அந்த மனைவி மூலம் பிறந்த ஒரு மகனும் இருக்கின்றனர். இதைத் தவிர அவனுக்கு, நன்றாகப் படித்த, அழகிய இரு காதலிகள் உண்டு. இது அங்கே அவனது மனைவி உட்பட அனைவரும் அறிந்த திறந்தவெளி ரகசியம். 
அவனுக்குச் சொந்தமான எண்ணற்ற நிறுவனங்களை மூன்றாகப் பிரித்து, ஒரு பகுதியை மனைவியின் நிர்வாகத்திலும், மீதி இரண்டு பகுதிகளை தலா ஒரு பகுதியாக இரு காதலிகளின் நிர்வாகத்திலும் விட்டிருந்தான். மொத்த நிறுவனங்களின் ஒரே முதலாளியாக அவனே இருந்தாலும், இந்த மூன்று பெண்களின் நிர்வாகத் திறமையால் அவனது பணிச்சுமை வெகுவாகக் குறைந்து, எப்பொழுதும் சுதந்திரமாக உள்நாட்டிற்குள்ளும் வெளிநாடுகளிலும் சுற்றிக் கொண்டிருப்பான். 
நான் சென்ற ப்ராஜெக்ட் அவனது ஒரு காதலியின் நிர்வாகத்தின் கீழ் வந்தது. நான் அவளுக்கு அறிமுகப்படுத்தப்பட்டேன். அழகிய தோற்றம், மென்மையான குரல், உயர் கல்வியினால் அடைந்த நாகரிகப் பண்புகளை உடையவளாயிருந்தாள். முழங்கால் வரை நீண்டு அலைபாய்ந்து கொண்டிருந்த அவளுடைய கூந்தலின் நீளம் மலைக்க வைத்தது. 
சிகரம் படத்தில் எஸ்பிபி யின் குரலில் ஒலிக்கும், ‘நங்கை உந்தன் கூந்தலுக்கு நட்சத்திரப் பூப்பறித்தேன், நங்கை வந்து சேரவில்லை நட்சத்திரம் வாடுதடி’ என்ற வரிகளுக்குப் பொருத்தமான கூந்தல். 
ஆனால் அவளுடைய முகத்தில் இனம் புரியாத ஒரு மென்சோகம் நிரந்தரமாகத் தங்கியிருந்தது. மொத்த உலகத்தாலும் கைவிடப்பட்ட மனிதன் இந்த உலத்தைப் பார்க்கும் விரக்தி கலந்த ஏளனப் பார்வையைப் போல் அது இருந்தது. ஏதோ ஒரு கலாச்சார அல்லது தத்துவச் சிக்கலை அவள் தன் வாழ்க்கைக்குள் ஒளித்து வைத்திருக்கிறாள் என்று நினைத்துக் கொண்டேன்.
பணம் செலுத்தும் விருந்தினனாக நான் ஒரு வீட்டில் தங்கினேன். அந்த வீடு மலை மீது அமைந்திருந்தது. அந்தப் பகுதியில் அனைத்து வீடுகளுமே மலைகளின் மீதுதான் கட்டப்பட்டிருந்தன. நான் தங்கியிருந்த வீட்டு வாசலில் நின்று பார்த்தால், பிரம்மாண்டமான இந்து மகா சமுத்திரம் மிக அருகே தெரியும். 
நீராவி கிளம்பிக் கொண்டிருக்கும் சமுத்திரத்தின் மேற்பரப்பும், முடிவின்மைக்கு அப்பால் தெரியும் கடல்-தொடுவான சந்திப்பும் ஆழ்மனதுடன் நேரடியாகத் தொடர்பு கொண்டு, உறைந்து கிடக்கும் சில ஆழ்மனப் படிமங்களை இடம் மாற்றி வைப்பது போன்ற உணர்வை ஏற்படுத்தும். 
அந்த வீட்டின் உரிமையாளன் எனது வாடிக்கையாளரின் ஒரு நிறுவனத்தில் பணியில் இருப்பவன். அவன் பார்ப்பதற்கு பழைய நடிகர் அசோகனைப் போல இருந்தான். எப்பொழுதும் முழு மொட்டைத் தலையுடன் இருப்பான். அவன் அந்த வீட்டில் தன் காதலியுடனும் கல்லூரியில் படிக்கும் தனது மகனுடனும் வசிக்கிறான். 
குழந்தை பெற்றுக்கொண்டு இருபது வருடங்களாக அந்த ஜோடி திருமணம் செய்து கொள்ளாமல் வாழ்கிறார்கள். நான் பார்த்த வரையில் இந்த உலகில் மிக மிக சந்தோஷமான ஜோடி அவர்கள்தான். ஒரு ஆணுக்கும் பெண்ணுக்கும் இடையே இருக்க வேண்டிய, அல்லது, இருக்க வேண்டும் என்று நாம் நினைத்துக் கொண்டிருக்கிற அந்தத் திரை அவர்களுக்கு இடையே சுத்தமாக இல்லை. அவர்கள் இருவரும், ஒருவர் மனதை மற்றவருக்கு முழுமையாகத் திறந்து வைத்திருக்கிறார்கள். 
அந்த வீட்டில் நான் தங்கியிருந்த ஒன்றரை மாதங்களில், எனக்குத் தெரிந்த வழிமுறைகளில் அந்த ஜோடியின் உளவியலை ஆராய்ச்சி செய்தேன். அவர்கள் நடிப்பது போல் தெரியவில்லை. 
அந்த வீட்டின் பின்புறமாக இருந்த பழத்தோட்டத்திற்கு இரவு நேரங்களில் நிறைய பழந்திண்ணி வவ்வால்கள் பழ வேட்டைக்கு வரும். வீட்டு உரிமையாளன் சரியான இடங்களில் வலைகளைக் கட்டி இரவு நேரங்களில் வவ்வால்களைப் பிடிப்பான். பிடிபட்ட வவ்வால்களைத் தனக்குப்போக மீதம் உள்ளவற்றை உணவகங்களுக்கு விற்றுவிடுவான். எனக்குக் கொடுத்த உணவிலேயே ஒருமுறை வவ்வால் கறியைக் கலந்து விட்டான். நான் அதைச் சாப்பிட மறுத்துவிட்டேன்.
அடுத்ததாக க்ளைமாக்ஸ். 
என்னுடைய ஒரு மாதப் பணி முடிந்து நான் கிளம்பத் தயாரானேன். ஆனால் ப்ராஜெக்டில் சில இறுதிக்கட்ட வேலைகள் பாக்கி இருந்தன. என்னுடைய வாடிக்கையாளர் என்னுடன் மிகவும் சமாதானமாகப் பேசி இரண்டு வாரங்கள் மேலதிகமாக அங்கே பணி செய்ய என்னைச் சம்மதிக்க வைத்தான். முடியும் தருவாயிலிருந்த என்னுடைய விசாவையும் நீட்டித்துத் தருவதாக எனக்கு வாக்களித்தான். நீட்டிக்கப்பட்ட அந்த இரண்டு வாரங்களும் கழிந்தன. 
இதற்கிடையே, சொந்தக் காரணங்களால் நான் உடனே இந்தியாவிற்கு வரவேண்டிய சூழ்நிலை ஏற்பட்டது. ஆனால் அவன் மேலும் இரண்டு வாரங்கள் என்னை அங்கே இருந்து ப்ராஜெக்டை நூறு சதவிகிதம் முடித்துவிட்டுக் கிளம்பச் சொன்னான். நான் இருக்க வேண்டிய அளவுக்கு அங்கே எந்த முக்கியமான வேலையும் பாக்கி இல்லாததால், நான் தீர்க்கமாக மறுத்து விட்டேன். 
அவனிடமிருந்து எனக்கு நீட்டிக்கப்பட்ட விசாவும், திரும்பிச் செல்ல விமான டிக்கெட்டும் தரப்பட வேண்டும். ஆனால், அவன் என்னிடம் சொல்லாமல் எங்கோ வெளிநாட்டிற்குச் சென்றுவிட்டான். 
அவனை எந்த விதத்திலும் தொடர்பு கொள்ள முடியவில்லை. அவனுடைய காதலியான கூந்தல் அழகியுடன் பேசிப் பார்த்தேன். இதுபோன்ற விஷயங்களில் முடிவெடுக்க அவளுக்கு அதிகாரம் இல்லை என்று சொன்னாள். என்னுடைய துபாய் தலைமை அலுவலகத்திடம் பேசினேன். அவர்கள் அவனை எப்படியோ தொடர்பு கொண்டு அவனிடம் என்னைத் திருப்பி அனுப்பும்படி வலியுறுத்தினார்கள். அவர்களுடைய வலியுறுத்தலுக்கும் அவன் அசைந்து கொடுக்கவில்லை. எனவே எனது துபாய் அலுவலகத்திலிருந்து எனக்கு முழு சுதந்திரம் அளித்து, நான் விரும்பிய தேதியில் விரும்பிய விமானத்தில் டிக்கெட்டை புக் செய்து எனக்கு அனுப்பி விட்டார்கள்.
நான் செய்த தவறு அவனை நம்பியது. என்னுடைய செஷல்ஸ் விசா காலாவதியாகி விட்டதால், எனக்கு அந்த நாட்டு ஏர்போர்ட்டில் பிரச்சினைகள் உண்டாகும் என்பது எனக்கும் தெரியும், அவனுக்கும் தெரியும். எனவே, அவனுடைய தயவில்லாமல் நான் அந்த நாட்டை விட்டு வெளியேற முடியாது என்று அவன் உறுதியாக நம்பியிருக்க வேண்டும். 
ஆனால் என்னுடைய சூழ்நிலையில், ஏர்போர்ட்டில் என்ன பிரச்சினை வந்தாலும், அவனுக்குத் ‘தெரியாமல்’ அந்த நாட்டை விட்டு வெளியேறி விடவேண்டும் என்பதில் உறுதியாக இருந்தேன். ஏனென்றால், அவனுக்கு அந்த நாட்டில் இருந்த அரசியல் மற்றும் அதிகாரிகளின் செல்வாக்கைப் பயன்படுத்தி, எனக்கு எப்பேற்ப்பட்ட துன்பத்தையும் உருவாக்க முடியும்.
என்னுடைய வாடிக்கையாளருக்கோ அவனுடைய ஆட்களுக்கோ தெரியாமல் தப்பிப்பதற்கான திட்டங்களைத் தீட்டினேன். நான் தங்கியிருந்த வீட்டின் உரிமையாளன் மிகவும் நல்லவன்தான், ஆனால் அவனும் அதே நிறுவனத்தில் வேலை செய்பவன் என்பதால் அவனிடமும் ரகசியம் காத்தேன். 
ஒரு நம்பிக்கையான டாக்ஸி டிரைவரைப் பழகி, குறிப்பிட்ட நாளில் மலையின் மீதிருந்த என்னுடைய இருப்பிடத்திலிருந்து ஏர் போர்ட் செல்வதற்கு, வழக்கமான தொகையை விட பல மடங்கு தொகையை அமெரிக்க டாலராகவே அளிப்பதாக வாக்களித்து அட்வான்ஸ் கொடுத்தேன். அந்த டாக்ஸி டிரைவர் சந்தோஷத்தில் திக்குமுக்காடிப் போய்விட்டான். 
கடைசி நேரத்தில் தவறு எதுவும் நடந்துவிடக்கூடாது என்பதால், அந்த டாக்ஸி டிரைவருக்கு என்னுடைய இருப்பிடத்திற்கு எந்த சாலைகள் வழியாக வரவேண்டுமென்று பயிற்சி அளித்தேன். 
என்னுடைய வீட்டு உரிமையாளரிடம், எனது நண்பர்கள் சிலர் செஷல்ஸுக்கு சுற்றுலா வந்திருப்பதாகவும், வரும் நாட்களில் எதோ ஒரு நாளில் மாலை வேளையில் நான் அவர்களைச் சந்திக்கத் திட்டமிட்டிருக்கிறேன் என்றும், பேச்சுவாக்கில் அவ்வளவாக முக்கியமில்லாத ஒரு விஷயத்தைச் சொல்வது போலச் சொல்லி வைத்திருந்தேன். 
நான் கிளம்ப நினைத்திருந்த நாளுக்கு முதல் நாள், வெளிநாடு சென்றிருந்த என்னுடைய வாடிக்கையாளர் திரும்ப வந்துவிட்டான். நான் அவனிடம் சகஜமாகப் பேசினேன். என்னை உடனே திருப்பி அனுப்ப முடியாத்தற்காக வருந்துவதாகச் சொன்னான். அவனுடைய வருத்தத்தை நான் புன்னகையுடன் ஏற்றுக் கொண்டதால், அவன் மகிழ்ச்சியடைந்தான்.
நான் தப்பிக்க வேண்டிய தினம் வந்தது. அன்று என்னென்ன செய்ய வேண்டும், யாருக்கும் சந்தேகம் வராதபடி எப்படி நடந்து கொள்ள வேண்டும் என்று பலமுறை மனதிற்குள் ஒத்திகை பார்த்திருந்தேன். 
என்னுடைய விமானம் நடு இரவில்தான் கிளம்பும். எனவே பகல் முழுவதும் வழக்கம் போல் வேலை செய்துவிட்டு மாலையில் தங்குமிடத்திற்கு வந்தேன். டாக்ஸி டிரைவருடன் தொடர்பில் இருந்தேன். சரியான நேரத்தில் டாக்ஸி வந்தது. 
அந்த நேரம் பார்த்து பெரிய மழை ஆரம்பித்திருந்தது. வீட்டுக்காரனிடம், நண்பர்களைச் சந்தித்துவிட்டு இரவுக்குள் திரும்பி விடுவதாகச் சொல்லிவிட்டு அவனுடைய பதிலுக்குக் காத்திராமல் நிதானமாக நடந்து டாக்ஸியில் ஏறினேன். 
அவனுக்குச் சந்தேகம் ஏற்பட்டிருக்க வாய்ப்பில்லை. ஏனென்றால், முன்பே திட்டமிட்டிருந்தபடி நான் என்னுடைய லக்கேஜ் எதையும் என்னுடன் எடுக்கவில்லை. சிறிய தோள் பையில் லேப்டாப்பை மட்டும் எடுத்துக்கொண்டு கிளம்பி விட்டிருந்தேன். நிறைய ஆடைகளையும் சில நல்ல பொருட்களையும் தெரிந்தே இழந்திருந்தேன். அந்தப் பெருமழையிலும் அற்புதமாக டிரைவ் செய்து அந்த டாக்ஸி டிரைவர் என்னை ஏர்போர்ட்டில் இறக்கி விட்டான்.
செக்-இன் சடங்குகள் முடிந்து இம்மிக்ரேஷன் வரிசையில் நின்றேன். இங்கே என்ன வேண்டுமானாலும் நடக்கலாம் என்று எனக்குத் தெரியும். விசா காலாவதி ஆகி விட்டதால், விசா முடிந்த பின்பும் இந்த நாட்டுக்குள் நான் என்ன செய்து கொண்டிருந்தேன் என்று நீண்ட விசாரணைக்கு உட்படுத்தலாம், அல்லது, எனக்கு ஸ்பான்சர் செய்த என்னுடைய வாடிக்கையாளரின் நிறுவனத்தை போனில் தொடர்பு கொண்டு என்னைப் பற்றி விசாரிக்கலாம், அல்லது, நான் செஷல்ஸுக்குள் இனிமேல் நுழைய முடியாதபடி என்னுடைய பாஸ்போர்ட்டில் தடை ஸ்டாம்பை அடித்து மங்களம் பாடி அனுப்பி வைக்கலாம், அல்லது, பெரிய தொகையாக அபராதம் வசூலிக்கலாம், அல்லது, நாகரிகமான முறையில் எச்சரித்து விட்டு விடலாம். இவற்றில் எது நடந்தாலும் எனக்குக் கவலையில்லை. 
என்னுடைய விமானம் கிளம்புவதற்குள் என்னுடைய வாடிக்கையாளர் என் மீது எந்த விதமான பொய் குற்றச்சாட்டும் சுமத்தி, தன்னுடைய செல்வாக்கின் மூலம் என் பயணத்தை நிறுத்திவிடக் கூடாது என்பது மட்டுமே என் பிரார்த்தனையாக இருந்தது. 
அந்தப் பெண் அதிகாரியிடம் பாஸ்போர்ட்டைக் கொடுத்துவிட்டு நின்றேன். அவள் கம்ப்யூட்டரைத் தட்டிப்பார்த்துவிட்டு என்னை முறைத்துக்கொண்டே கேட்டாள்
ஏன் இரண்டு வாரங்கள் அதிகமாகத் தங்கினாய்?” 
நான் அவளிடம் மென்மையான குரலில்
என்னுடைய விசா கால நீட்டிப்பு செய்யப்பட்டதாக என்னுடைய ஸ்பான்சர் நிறுவனத்தில் சொன்னார்கள், மற்றபடி எனக்கு இந்த நாட்டு விசா நடைமுறைகளைப்பற்றி எதுவும் தெரியாது. நான் வந்த வேலை முடிந்துவிட்டது, எனவே கிளம்புகிறேன்” என்றேன். 
ஒரு சிறிய ஃபார்மைக் கொடுத்து அதை நிரப்பிக் கையெழுத்திடச் சொன்னாள். 
“தயவு செய்து இதேபோல் இனிமேல் சட்டத்தை மீறி நடந்து கொள்ளாதே” என்று அறிவுரை சொல்லி பாஸ்போர்ட்டில் ஸ்டாம்ப் அடித்து என்னைப் பயணத்திற்கு அனுமதித்தாள்.
நீண்ட பெருமூச்சுடன் காத்திருப்பு ஏரியாவில் விமானத்தைப் பிடிக்கக் காத்திருந்தேன். நான் இதேபோலத் தப்பிக்கப்போவதாக இந்தியாவில் இருந்த என் குடும்பத்தினரிடம் போனில் ஏற்கனவே சொல்லி வைத்திருந்தேன். என் மகள் தூங்காமல் எனக்கு வாட்ஸப்பில் அறிவுரை சொல்லிக்கொண்டே இருந்தாள்,
 “அப்படிச் செய்ங்கப்பா”
இப்படிச் செய்யாதீங்கப்பா”
லேப்டாப் போனாக்கூட பரவால்லப்பா, பாஸ்போர்ட்டை மட்டும் எடுத்துட்டு கிளம்பிருங்கப்பா”
யாராவது ஆபீஸர்ஸ் கேட்டா, உங்க குடும்பத்துல உங்களுக்காக எல்லோரும் காத்துக்கிட்டிருக்காங்கன்னு சொல்லுங்கப்பா, உடனே விட்ருவாங்கப்பா” என்று ஒரே விஷயத்தை விதம் விதமாக எழுதி மெசேஜ் செய்துகொண்டிருந்தாள். 
அவளை இயக்குவது என் மனைவி என்பது எனக்குத் தெரியும். அதேபோல, என் மகள் சொல்லும் எதையும் மறுப்புச் சொல்லாமல் ஏற்றுக்கொள்வேன் என்பது என் மனைவிக்கும் தெரியும். ஏனென்றால் மகளைப் பெற்ற எல்லாத் தகப்பன்களும் அதைத்தானே செய்து கொண்டிருக்கிறார்கள். 
விமானத்திற்குள் சென்று அமர்ந்தேன். நடிகர் அசோகனின் தோற்றத்திலிருக்கும் வீட்டு உரிமையாளன் எனக்கு போன் செய்து கொண்டிருந்தான். நான் எடுக்கவில்லை. நேரம் நள்ளிரவைத் தாண்டி விட்டதால், நான் ஏன் இன்னும் வீடு திரும்பவில்லை என்று அவன் சற்றுக் கலவரமடைந்திருக்கலாம். போனை ஸ்விட்ச் ஆஃப் செய்துவிட்டு அவனுக்கு மானசீகமாக பதில் சொன்னேன்,
 ‘உன் வீட்டுக்கு மட்டுமல்ல, இனிமேல் உன் நாட்டுக்கே திரும்ப வரமாட்டேன்’. 
விமானம் மேலெழும்பி விமானச் சக்கரங்கள் தங்கள் கூடுகளுக்குள் அடைந்து கொள்ளும் சத்தம் கேட்டது. முதன்முதலில் சக்கரத்தைக் கண்டுபிடித்த அந்த ஆதி மனிதன், அவனுடைய வழித்தோன்றல்கள் சக்கரங்களைப் பயன்படுத்தி வானில் பறப்பார்கள் என்று கற்பனை கூட செய்திருக்க மாட்டான்




Name

அகல்விளக்கு,24,அக்கினிப் பறவை.,32,அந்திமழை பொழிகிறது..,7,அம்மம்மா.. கேளடி தோழி...!,176,ஆசையா.. கோபமா...?,16,உயிர்தேனே..! உன்னாலே.. உயிர்த்தேனே..,33,உன்னோடு நான்,25,எங்கிருந்தோ ஆசைகள்...,91,ஒற்றையடிப்.. பாதையிலே..,10,கடாவெட்டு,1,கல்யாணமாம் கல்யாணம்,1,கல்லூரிக் காலத்திலே..,15,சொல்லாமலே பூப்பூத்ததே ..,35,தஞ்சமென வந்தவளே,33,தென்னம்பாளை,1,தொடுவானம்,18,நதி எங்கே போகிறது...?,6,நிலாவெளியில்,17,பனித்திரை,1,புலர்கின்ற பொழுதில்,42,மகராசி,3,மழைச்சாரலாய் மனம் நனைத்தாய்...,32,முகங்கள் -part -II,9,முகில் மறைத்த நிலவு.,41,மூரத்தியின் பக்கங்கள்,13,மௌனமான நேரம்..,22,ராக்கெட்,1,ராதையின் நெஞ்சமே..,24,வந்தாள் மகாலட்சுமியே...,27,வாங்க பேசலாம்,9,
ltr
item
Muthulakshmi Raghavan Novels: திக் திக் நிமிடங்கள்
திக் திக் நிமிடங்கள்
https://1.bp.blogspot.com/-Y3EWSfIY9CQ/XPThdq6ELXI/AAAAAAAAAn0/o86AnAEnz4QnBWyZJVfWMYam1EHW5nWLACPcBGAYYCw/s1600/12299241_458097944373776_513891426058382829_n.jpg
https://1.bp.blogspot.com/-Y3EWSfIY9CQ/XPThdq6ELXI/AAAAAAAAAn0/o86AnAEnz4QnBWyZJVfWMYam1EHW5nWLACPcBGAYYCw/s72-c/12299241_458097944373776_513891426058382829_n.jpg
Muthulakshmi Raghavan Novels
https://www.muthulakshmiraghavannovels.com/2020/04/moorthiyinpakkangal.html
https://www.muthulakshmiraghavannovels.com/
https://www.muthulakshmiraghavannovels.com/
https://www.muthulakshmiraghavannovels.com/2020/04/moorthiyinpakkangal.html
true
5064978942293848112
UTF-8
Loaded All Posts Not found any posts VIEW ALL Readmore Reply Cancel reply Delete By Home PAGES POSTS View All RECOMMENDED FOR YOU LABEL ARCHIVE SEARCH ALL POSTS Not found any post match with your request Back Home Sunday Monday Tuesday Wednesday Thursday Friday Saturday Sun Mon Tue Wed Thu Fri Sat January February March April May June July August September October November December Jan Feb Mar Apr May Jun Jul Aug Sep Oct Nov Dec just now 1 minute ago $$1$$ minutes ago 1 hour ago $$1$$ hours ago Yesterday $$1$$ days ago $$1$$ weeks ago more than 5 weeks ago Followers Follow THIS PREMIUM CONTENT IS LOCKED STEP 1: Share. STEP 2: Click the link you shared to unlock Copy All Code Select All Code All codes were copied to your clipboard Can not copy the codes / texts, please press [CTRL]+[C] (or CMD+C with Mac) to copy