எண்ணியிருந்தது ஈடேற... 239

எண்ணியிருந்தது ஈடேற... பாகம் – 8 ஆசிரியர் கடிதம்... என் பிரியத்துக்குரிய வாசக... வாசகிகளே...!     எட்டு பாக நாவலை எழுத வேண்...


எண்ணியிருந்தது ஈடேற...
பாகம் – 8


ஆசிரியர் கடிதம்...

என் பிரியத்துக்குரிய வாசக... வாசகிகளே...!
    எட்டு பாக நாவலை எழுத வேண்டும் என நான் எண்ணியிருந்தது ஈடேறி விட்டது.. இதை எழுத ஆரம்பித்த இந்த எட்டு மாதங்களில் என் வாழ்வில் நடந்த சில திருப்பங்கள், மாறுதல்கள் எனது கையைக் கட்டிப் போட முனைந்தன.. தடைகளைத் தகர்த்து என் பேனா தான் நினைத்ததை சாதித்து விட்டது..
    தடைகளற்ற ஓட்டமில்லை.. என் வாழ்வின் ஓட்டத்தில் தடைகளைத் தவிர எதுவுமில்லை.. தடைகளைக் கண்டு நான் அஞ்சவில்லை.. தடை தாண்டும் ஓட்டத்தில் சில நேரம் நான் வீழ்ந்தபோது மனதில் அடி வாங்கினேன்.. கண்ணீர் விட்டேன்.. அடிபட்டால் வலிக்காதா..?
    என்னை உற்சாகப் படுத்தும் ஊக்க மருந்தாக ஏதேனும் ஓர் நிகழ்வு என் வாழ்வில் நிகழ்ந்து விடாதா.. எனக்கான அங்கீகாரம் கிடைத்து விடாதா என்று ஏங்கும் ஏக்கம் இன்றளவும் என் மனதில் உண்டு.. இவ்வுலகம் நமது முகத்தைப் பிரதிபலிக்கும் கண்ணாடியல்ல.. நாம் காட்டும் இன்முகத்தையும், நேர்மையையும் இந்த உலகம் திருப்பிக் காண்பிப்பதில்லை.. எதிராளிகளின் குணங்களைப் பிரதிபலிக்கும் கண்ணாடியாக நான் மாற வேண்டிய சூழ்நிலைகளை எதிர் கொள்ளும் போது என் மனம் அதிர்கின்றது.. ஏன் இந்தப் போராட்டம் என்ற கேள்வி என் மனதை ரணமாக்குகிறது..

போராடும் வாழ்க்கையிலே..
    போர்புரிய நான் சளைத்ததில்லை..
இருந்தபோதும் என் இறைவா..!
    இறுதிவரை எனக்குப் போர்தானா..?
    எப்போதும் இறைவனிடம் நான் கேட்கும் கேள்வியையே இப்போதும் முன் வைக்கிறேன்.. ஆற்றுக்கு அணை கட்டலாம்.. அருவிக்கு அணை கட்ட முடியுமா..? என் எழுத்து கொட்டுகின்ற பேரருவி..! இது வெறும் கர்வமல்ல.. எனக்கே எனக்கான வித்யா கர்வம்..!
    இதுவரை 160 டைட்டில்களில் 19௦  வால்யும் கதைகளைப் படைத்திருக் கிறேன்.. இவை அனைத்துமே மென்மையான காதல் உணர்வுகளைக் கொண்ட நகைச்சுவை இழையோடும் கதைகளல்ல.. துன்பங்களையும், துயரங்களையும் சுமந்த கதைகளையும் நான் படைத்திருக்கிறேன்.. சோகங்களையும் சுமை நிரம்பிய உள்ளங்களையும் எனது பேனா சொல்லி யிருக்கின்றது.
இன்றும் அந்திவானம், தென்றலைத் தேடி, அக்கினி பறவை, காத்திருந்தேன் காற்றினிலே, மௌனத்தின் குயிலோசை, யாரோடு யாரோ, ஆராதனை போன்ற கதைகளை எனது வாசக, வாசகியர் தேடித்தேடிப் படிக்கிறார்கள்.. நெஞ்சில் நெருஞ்சி முள்கள் நிரட வாழும் சாபம் பெற்ற மனிதனின் கதையைச் சொல்லும் 'இது நீரோடு செல்கின்ற ஓடம்..' நாவல் மூன்று பாக நாவல்களாக விரிந்து மனதைக் கசக்கிப் பிழியும் சோகத்தை மட்டுமே சொன்னது.. இது மிகப் பெரிய வெற்றியை பெற்றுத் தந்த நாவல்.. எனது 'ஏழு ஸ்வரங்கள்..' நாவல் வழக்கமான எனது பாணியிலிருந்து மாறுபட்டு, ஏழு ஸ்வரங்களாகப் பிரிந்து, ஏழு பிறவிகளின் ஏழு காலகட்ட கதையைச் சொன்ன நாவல்.. இந்தக் கதையை எழுதியது ஒரு மிகப் பெரும் சவால்.. எனது வாசக, வாசகியர் இந்தச் சவாலில் என்னை வெல்ல வைத்தார்கள்.. ஏழு ஸ்வரங்களையும் விரும்பிப் படித்தார்கள்..
    என் மனம் வலித்தால் அந்த மன வலிமையும் நான் எழுத்தாக்குவேன்.. சிரிப்பில் மட்டுமல்ல, உன் சோகத்திலும் நாங்கள் துணை நிற்போம் என்று என் வாசக, வாசகியர் என்னுடன் கை கோர்ப்பார்கள்.. எனை நோக்கி வீசப்பட்டக் கற்களைக் கொண்டு பல அடுக்கு மாளிகைகளைக் கட்டிக் கொண்டவள் நான்..
    எங்கோ ஓர் மூலையில் இந்த பிரபஞ்சத்தின் சிறு துகளாக அடையாளமற்ற மனுஷியாக ஜீவித்திருந்தேன்.. எனது பத்து வயதில் கவிதை எழுதினேன்.. இருபத்தி நான்காம் வயதில் கதைகளை எழுத ஆரம்பித்தேன்.. முப்பத்தி ஒன்பதாம் வயதில் 'முத்துலட்சுமி ராகவன்' என்ற எழுத்தாளராக அடையாளம் காணப்பட்டேன்..
    எனக்கென்ற இந்த அடையாளம் கிட்ட முப்பது ஆண்டுகள் காத்திருந்தேன்.... இப்போதும் எனது அக்கம் பக்கத்தினரால் கூட அறியப்படாத சாதாரண மனுஷியாகத்தான் வாழ்ந்து கொண்டிருக்கிறேன்.. பெயரையும் புகழையும் தேடவில்லை.. பாராட்டும் மேடைகளை நாடிய தில்லை.. மௌனத்திரையின் மறைவில் மறைந்து என் பேனாவை மட்டும் இவ்வுலகிற்கு வெளிப்படுத்தும் என்மீது போட்டியையும், பொறாமையையும், காழ்ப்புணர்ச்சியையும் ஏவி விட வேண்டாம்..
'எம்.ஆர் போல எழுதுங்கள்' என்று எனது சக எழுத்தாளர்களை தூண்டும் அளவிற்கு நான் ஒன்றும் பெரிய அப்பா டக்கர் அல்ல.. எழுத்துலகில் நான் வெளிப்பட்ட போது புகழ்பெற்ற எழுத்தாளர் ஒருவரின் பெயரைச் சொல்லி அவரைப் போல எழுதுங்கள் என்றார்கள்.. நான் மறுத்து விட்டேன்..
    "என் கதைகளில் எனது உணர்வுகளும் கதை சொல்லும் பாணியும்தான் வெளிப்படும்.. வேறு ஒருவரின் பாணியில் என்னால் எழுது முடியாது.. எனது எழுத்துக்கள் என்னைத்தான் அடையாளம் காட்ட வேண்டும்.. வேறு ஒருவரை அல்ல.."
    இதைச் சொல்லும் போது எனது முதல் கதை கூட வெளிவந்திருக்கவில்லை.. இந்த சுய அடையாளத்தில் எழுத்தாளர்கள் உறுதியாக இருக்க வேண்டும் ..
எனக்கென்று வாசக வட்டம் இருக்கிறதுதான்.. அது நான் உருவாக்கிய வாசக வட்டமல்ல.. தானாக உருவாகிய வாசக வட்டம்..! ஜனரஞ்சகமான வார இதழ்களில் எனது சிறுகதைகளோ, குறும் கதைகளோ, தொடர்கதைகளோ வெளி வந்ததில்லை.. புகழ்பெற்ற எழுத்தாளர்களின் வரிசையில் என் பெயர் உச்சரிக்கப் படவில்லை.. மெர்க்குரி விளக்குகளின் ஒளிச்சிதற்களில் இருந்து தனிமைப்பட்டு சின்னஞ்சிறு அகல்விளக்காக கானகத்தில் தொலைந் திருப்பவள் நான்.. மற்றவர்களின் கண்களை உறுத்தும் அளவிற்கு புகழ் ஏணியில் ஏறி விடவில்லை..
ஆகஸ்ட் 2016-ல் வெளிவந்த எனது 'தென்னங் கீற்றின் பாடலிலே...' என்ற நாவலின் கதை சுவராஸ்யமானது ஒரு தாய்..! அவளுக்கு இரண்டு மகன்கள்.. ஒருவன் பெற்ற மகன்.. இன்னொருவன் வளர்ப்பு மகன்.. இருவரில் ஒருவன் திருமணவயதில் தாயைப் பிரிந்து வீட்டை விட்டு வெளியேறி விடுகிறான்.. வெளியேறிய தம்பிகாரன் ஒரு பெண்ணைக் காதலிக்கிறான்.. அவனது காதல் விவாகரம் அண்ணனுக்குத் தெரிந்து விடுகிறது.. அவன் தம்பியின் காதலைப் பற்றியும், காதலியைப் பற்றியும் தாயிடம் சொல்லாமல் அவனுக்காக தம்பியின் காதலியை அவர்களது அம்மாவே பெண் கேட்கும்படியான சூழ்நிலையை உருவாக்கி விடுகிறான்.. அந்தப் பெண் இளைய மகனின் காதலி என்பதை அறியாமல் மூத்த மகனுக்காக பெண் கேட்டு விடுகிறாள் அம்மா.. இளைய மகனோ அவனது காதல் விவாகரம் தெரிந்து அவனுக்காகத்தான் அவனுடைய அம்மா பெண் கேட்டிருக்கிறாள் என்று மகிழ்ந்து போகிறான்..
என்னங்க.. 'பாகுபலி-2' கதையைப் போலவே இருக்கிறதே என்று நினைக்கறீங்களா..? இது எனது 'தென்னங் கீற்றின் பாடலிலே..' நாவலின் கதைங்க.. இந்தக் கதையைத்தான் திரையிடப் பட்ட முதல் வாரத்திலேயே ஆயிரம் கோடி வசூலை ஈட்டிய 'பாகுபலி-2' திரைப்படத்தின் அதி முக்கிய சம்பவங்களாக கொண்டு வந்திருக்கிறார்கள்.. ஒரே கற்பனை இருவருக்கும் வருமென்றால் முதல் கற்பனை என்னுடையது.
அது என்ன மாயமோ, மந்திரமோ தெரிய வில்லை.. எனது கற்பனையில் உருவான கதைகளை மிகப் பெரும் படைப்பாளிகள் தத்தம் கற்பனைகளின் உருவான கதைகளாக படைத்து விடுகிறார்கள்.. என்னதான் அவர்கள் சீவி முடித்து சிங்காரித்து.. சிவந்த நெற்றியில் பொட்டும் வைத்து திரையிட்டாலும் படைத்தவளுக்குத் தெரியாதா, தான் படைத்த கதை இதுவென்று..?
எனது முந்தைய ஆசிரியர் கடிதத்தில்.. பதிவிட்டிருந்ததை மறுபடியும் இங்கே நினைவுறுத்து கிறேன்.. வெளிநாடுகளில் கலைவளங்களும், கற்பனை வளங்களும் பாதுகாக்கப் படுவதைப் போல நம் நாடுகளில் பாதுகாக்கப் படுவதில்லை..
ஓர் படைப்பாளியின் படைப்பு களவாடப்படும் போது அந்த படைப்பாளியின் மனம் படும் வேதனை எத்தகையதாக இருக்கும் என்பதை எவரும் நினைத்துப் பார்ப்பதில்லை..
நோயாளியாக நடமாடியபடி இரவும், பகலும் கண்விழித்து எழுதும் எழுத்தாளரின் தனிப்பட்ட படைப்பான கதைகளுக்கு பாதுகாப்பில்லை எனும் போது விரக்தி வரவில்லை.. வெறுப்புத்தான் வருகின்றது.

- நட்புடன் -
முத்துலட்சுமி ராகவன்




239


தொட்டிலில் தாலாட்டுப் போல இதமான குலுங்கலில் சுகமான உறக்கத்தின் ஊடே விழிப்பு வருவதைப் போல மயக்கத்திலிருந்து விழிப்பு வந்தது நந்தினிக்கு.. உடலின் அயர்வு போகவில்லை.. இமைகளைத் திறக்க முடியாமல் அசதி அழுத்தியது.. உடலின் ஒட்டுமொத்த சக்தியையும் திரட்டி வலுக் கட்டாயமாக கண்களைத் திறக்க முயன்றாள்.. முடியவில்லை.. தடக், தடக் என்ற ரயிலின் தாளலயத்துடன் கூடிய குலுக்கலாக இல்லாமல் திடிரென்று பலமான குலுக்கலும்.. மற்ற நேரங்களில் மிதமான குலுக்கலுமாக இருந்ததில் ரயில் பயணம் இப்படி இருக்காதே என்று குழம்பினாள்..
கால்களை நீட்டி நிமிர்ந்து படுக்க முடியாமல் குறுகலாக முடங்கியிருப்பதைப் போல் தோன்றியதில் இமைகளைத் திறக்காமல் அடிப்பார்வையாய் கம்பார்ட் மெண்டை ஆராய்ந்தாள்..
'இது டிரெயின் போலத் தெரியலையே..'
அவள் குழம்பிக் கொண்டிருக்கும் போதே பலமான குலுக்கல் ஏற்பட்டது.. சீட்டிலிருந்து நழுவி விழப் போய் கடைசி நொடியில் தப்பித்தாள்..
"பார்த்து ஓட்டுடா.. பன்னாடை..!"
கர்ண கடூரமாக காதுகளில் விழுந்த குரலில் நந்தினியின் மயக்கம் துளிக்கூட மிச்சமில்லாமல் தலை தெறிக்க ஓடிவிட்டது..
'டிரெயின் டிரைவரை இப்படித் திட்ட முடியாதே..'
முழுவதுமாக விழித்துப் பார்த்தால் அவளுக்கு மயக்கம் தெளிந்து விட்டதை 'அவன்' கண்டு பிடித்து விடுவான் என்று இமைகளை முழுவதுமாகத் திறக்காமல் லேசாகத் திறந்து பார்த்தாள்..
'அடி நந்தினி..! இது கார்டி..'
மகாப்பெரிய கண்டுபிடிப்பை கண்டு பிடித்து விட்டதைப் போல அவளது மனம் அவளுக்கு அறிவுறுத்தியது..
'காரா..?'
நந்தினிக்கு வெகு அருகில் தெரிந்த காரின் மேல் பகுதி.. அது கார்தான் என்பதை தெள்ளத் தெளிவாக அறிவுறுத்தியது..
'டிரெயினில இல்ல போய்க்கிட்டு இருந்தேன்.. காருக்குள் எப்படி வந்தேன்..? எப்போது வந்தேன்..?'
யோசிக்க முடியாமல் நந்தினியின் தலை விண் விண்னென்று தெறித்தது.. அசைந்து படுத்தால் 'அவன்' கண்டு கொள்வான் என்பதால் உடலை அசைக்காமல் அரைப் பார்வையில் பார்த்தாள்..
அவளை பின் இருக்கையில் படுக்க வைத்திருந்தான்.. அடுத்த சீட்டில் இருவர் அமர்ந்திருக்க முன் பக்கத்தில் டிரைவர் மட்டும் அமர்ந்து காரை ஓட்டிக் கொண்டிருந்தான்..
'இது பார்ச்சுனர் கார்..'
பின்பக்கத்தில் அவளைத் தூக்கிக் கடாசி விட்டு நடுப்க்க இருக்கையில் காவலாக 'அவன்' உட்கார்ந்திருக் கிறான்.. நந்தினி மயக்கத்தில் ஒடுங்கியிருந்த இருக்கையின் பக்கமாக கதவு இருக்காது.. அவள் வெளியே வர வேண்டுமானால் நடுப்பக்க இருக்கையைக் கவிழ்த்து வழி ஏற்படுத்தித்தான் வெளியேறியாக வேண்டும்..
'படுபாவி..! பிளானெல்லாம் பக்காவா போடுறான்..'
இல்லையென்றால் மட்டும் கார்க்கதவை திறந்து நந்தினியால் வெளியே குதித்து விட முடியுமா..? கார்க்கதவைத் திறந்து மூடும் கட்டுப்பாடு காரை ஓட்டுபவரின் கையில் அல்லவா இருக்கும்..?
இதைக்கூட சிந்திக்க முடியாத நிலையில் செயலிழந்து இருந்தாள் நந்தினி.. மயக்கம் தெளிந்திருந்தாலும் உடல் களைப்படைந்திருந்தது..
'எவ்வளவு நேரமா மயக்கத்திலிருக்கிறேனோ.. தெரியலையே..'
கார்க் கண்ணாடி வழியாக மெல்லிய வெளிச்சம் தெரிந்தது... கார் எங்கே போய்க் கொண்டிருக்கிறது என்று தெரியவில்லை... அடுத்த இருக்கையில் உட்கார்ந்திருந்தவனின் பின்பக்கத் தோற்றம் மட்டுமே தெரிந்தது.. ரயிலில் பயணித்த போது 'அவன்' முகத்தைக் கூட அவள் தெளிவாகப் பார்த்துத் தொலைக்கவில்லை.. எவனோ ஒருவன்.. எதிர்சீட்டில் பயணிப்பவன் என்றுதான் நினைத்தாள்.. படுபாவி.. அவளைக் கடத்துவதற்காக வந்திருக்கிறான் என்று ஆருடமா கணித்திருந்தாள்..?
'எப்படி என் சீட்டுக்கு எதிர்சீட்டில் வந்து உட்கார்ந்திருந்தான்..? நான் ஒன்றும் டிக்கெட்டை ரிசர்வ் பண்ணவில்லையே.. நான் அந்த சீட்டிற்குத்தான் வரப் போகிறேன்னு இவனுக்கு எப்படித் தெரியும்..?'
கம்மாண்டர் அவளுடன் மங்களூர் எக்ஸ்பிரஸ்ஸில் ஒன்றாகப் பயணித்தான் என்றால் அவனுடைய கதையே வேறு.. அவனுக்கும் அவளுக்குமான டிக்கெட்டுகளை முன்பதிவு செய்து அவளுக்கான டிக்கெட்டை உத்ராவுக்கு அனுப்பி வைத்திருந்தான்.. இங்கே அப்படியில்லையே..
'அவன்...' பக்கத்தில் உட்கார்ந்திருந்தவனின் பின்பக்கத் தோற்றம் அவளுக்கு அறிமுகமானதைப் போல இருந்தது..
'யார் இவன்..?'
அவள் மூளையைக் கசக்க வேண்டிய அவசியத்தை உண்டாக்காமல் 'அவன்..' பக்கத்திலிருந்தவனிடம் பேச ஆரம்பித்தான்..
"தேங்க் யு அபராஜிதா.. உன்னோட ஹெல்ப் இல்லைன்னா இவளைக் கடத்தியிருக்க முடியாது.."
'அடப்பாவி..! இவன் அபராஜிதனா..?'
சமுத்ரா பீச்சில் அவளிடம் நல்லவன் போல உண்மைகளை விளம்பி விட்டுப் போனவன் திருவணந்தபுரத்தை விட்டு நகராமல் அங்கேயே சுற்றிக் கொண்டிருந்தானா..?
"எனக்கு இவளோட குணத்தைப் பற்றி நன்றாகத் தெரியும் மகேந்திரன்... ரவிச்சந்திரன் இவளிடம் உண்மையை மறைத்துட்டான்னு தெரிந்த அடுத்த செகண்டில் அவனையும் விட்டு ஓடுவாள்ன்னு உன்னிடம் சொன்னேனா இல்லையா..? எப்படி..? என்னோட கெஸ்ஸிங் சரியா இருந்ததா..?"
"பின்னே..? யார் நீ.. யோகானந்தனோட மகனாச்சே.. புள்ளி வைக்காமலே கோலம் போடறதில கில்லாடியாச்சே.. என்றைக்கு உன்னோட கெஸ்ஸிங் மிஸ்ஸிங் ஆகியிருக்கு..? தூள் கிளப்பிட்ட போ.."
"இவ சரியான தத்தி மகேந்திரா.. முன்கோபமும் முரட்டுப் பிடிவாதமும் அதிகம்.. மனசில ஒன்று தப்புன்னு பட்டிருச்சுன்னா அந்தப் பக்கம் திரும்பிக் கூடப் பார்க்க மாட்டா.. ஆனால் ஒன்று மகேந்திரா.. இவ மனதில தப்புன்னு படறது தப்பாகத்தான் இருக்கும்.. அந்த வகையில் இவள் கெட்டிக்காரி.. சரி எது, தப்பு எதுன்னு பார்க்கிற பார்வையிலேயே துல்லியமா கண்டு பிடிச்சுருவா.."
"அப்படித்தான் உன்னையும், உன் தங்கையையும் தப்பானவங்கன்னு கண்டு பிடித்தாளோ.. ஹா.. ஹா.."
மகேந்திரன் என்று அபராஜிதனால் அழைக்கப்பட்ட 'அவன்..' பலமாகச் சிரித்தான்.. அபராஜிதன் அந்தச் சிரிப்பில் கலந்து கொள்ளவில்லை..
"ஸாரி நண்பா.. சிரிப்பை அடக்க முடியலை.." என்றான் மகேந்திரன்..
"நானும், என் தங்கையும் தப்பானவங்கன்னா, நீயும் உன் அம்மாவும் யார் மகேந்திரன்..? நல்லவர்களுக்கும் நல்லவர்களோ..?"
அபராஜிதனின் குரலில் அப்பட்டமான எள்ளலும், இடக்கும் கலந்து ஒலித்தன.. மகேந்திரன் பல்லைக் கடிப்பது அவன் வார்த்தைகளை மென்று துப்புவதி லிருந்தே தெள்ளத் தெளிவாக தெரிந்தது..
"வார்த்தைகளைப் பார்த்து விடனும் அபராஜிதா.. நீ யாரிடம் பேசிக் கொண்டிருக்கிறாய் என்பதை நினைவில் வை.. மார்த்தாண்ட பூபதியின் மகன் மகேந்திர பூபதியிடம் பேசிக் கொண்டிருக்கிறாய்.."
'அடக்கடவுளே..! இவனும் ராஜ வம்சமா..' நந்தினிக்குள் எரிச்சல் மண்டியது..
இருபத்தி இரண்டாம் நூற்றாண்டைத் தொட்டுக் கொண்டிருக்கும் கால கட்டத்திலும் மன்னரும், மகுடமும் வந்து நின்றால் பற்றிக் கொண்டு வராதா..?
"ஹ..! நீதான் ராஜ வம்சம்..! நான் சாமானியன் பாரு.."
"உன்னைப் போல பெயருக்கு ராஜவம்சம்ன்னு பீற்றிக்கிற ஆளில்லை நான்.. பெயருக்கு ஏற்றதைப் போல ராஜ வாழ்க்கை வாழ்கிறவன்.. நீ உன் தாய்மாமன் மகனின் தயவில் அண்டிப் பிழைப்பவன்.. நினைவில் வைத்துக் கொள்.."
"மகேந்திரா.." அடிபட்ட வேங்கையின் ஆவேசத்துடன் உறுமினான் அபராஜிதன்..
"உஷ்ஷ்.. சத்தம் போடாதே.. உன்னையெல்லாம் சரிசமமாக என்னுடன் உட்கார வைத்திருப்பதால் நீயும், நானும் சமம்ன்னு மனப்பால் குடிக்காதே.. என் கால் தூசிக்கு இணையாக மாட்டாய் நீ.. மனதில் இருக்கட்டும்.. நண்பன்னு வாய் வார்த்தைக்குச் சொன்னால் நீ எனது நண்பனாகி விடுவாயா..?"
"நான் உனக்கு நண்பனாக முடியாது மகேந்திரன்.. ரவிச்சந்திரன்தான் உனக்கு உயிர் நண்பன்.."
மறுபடியும் அபராஜிதனின் குரலில் எள்ளலும், இடக்கும் திரும்பியிருந்தன..
"அவனைப் பற்றிப் பேசாதே.." மகேந்திரனின் கோபம் திசை திரும்பியிருந்தன..
"அவன் சிநேகித துரோகி.. நீயும் உன் தங்கையும் சரியான சமயத்தில் எனக்குத் தகவல் கொடுக்கலைன்னா இவளை கண்டு பிடிக்க முடியாமல் நான் வேறு ஒரு பெண்ணைக் கல்யாணம் செய்து தொலைத்திருப்பேன்.."
"உனக்குத்தான் கல்யாணம்ன்னாலே வேம்பாச்சே மகேந்திரா.. வெரைட்டியாய் ஹோட்டலில் சாப்பிட்டுப் பழக்கப் பட்டவனுக்கு வீட்டுச் சாப்பாடு பிடிக்காதுன்னு வியாக்கினம் பேசியவன்தானே நீ.. இப்ப என்ன கல்யாணத்தில இவ்வளவு இண்ட்ரெஸ்ட்டா இருக்கிற.."
"இண்ட்ரெஸ்ட்டாவது.. மண்ணாவது.. அதெல்லாம் ஒரு கழுதையும் இல்லை.. எனக்குக் கல்யாணம்ன்னு கண்யாகுமரி பூரா நியுஸ் பரவிருச்சு.. அது நடந்து தொலைக்கலைன்னா பிரஸ்டிஜ் இஷ்யூவாகி விடும்.. அதுதான் பிராப்ளம்.."
"ஓ.. அதிதான் பிராப்ளமோ.."
அபராஜிதன் திரும்பி பின்சீட்டைப் பார்த்தான்.. நடுங்கிப் போன நந்தினி மயக்கம் தெளியாதவளைப் போலக் கண்களை இறுக்கி மூடிக் கொண்டாள்.. பயமாக இருந்தது..
'கடவுளே..! காப்பாற்று..' மனதுக்குள் பிரார்த்தித்தாள்.
"இன்னும் மயக்கம் தெளியலை.." என்றான் அபராஜிதன்..
"இரண்டு நாளைக்குத் தெளியாது.." அலட்சியமாகச் சொன்னான் மகேந்திரன்..
'என்ன ஒரு நம்பிக்கை.. இதில் இவன் எக்ஸ்பர்ட் போல..' நந்தினி நினைத்துக் கொண்டாள்..
'இவன் சொல்வதைப் போல இரண்டு நாள்களுக்கு மயக்கம் தெளிந்திருக்காதுதான்.. நான்தான் இவன் மயக்க மருந்துக் கர்ச்சீப்பை முகத்தில் வைத்து அழுத்துகிறான்னு தெரிஞ்சதுமே மூச்சை அடக்கிட்டேனே.. அப்படியிருந்தும் ஒன்னு, ரெண்டு செகண்ட் மயக்க மருந்தை சுவாசிக்க வேண்டியதாப் போயிருச்சு.. அதில் வந்த மயக்கத்தில இவனுக என்னை அள்ளிப் போட்டுக்கிட்டு வந்துட்டானுக..'
ரயிலில் மகேந்திரன் அவளது முகத்தில் மயக்க மருந்தில் நனைக்கப்பட்டக் கைக்குட்டையை அழுத்திய நொடிகள் அவள் மனதில் வந்தன..
'நான் தான் பெல்ட் மன்னன்னு சொன்னானே.. இவன்தான் பெல்ட் மன்னன்னா.. கம்மாண்டர் யார்..? அபராஜிதன் கம்மாண்டரைத்தானே பெல்ட் மன்னன்னு சொன்னான்..?'
மயக்க மருந்தின் வீர்யம் குறைந்தும் நந்தினிக்குத் தலையைச் சுற்றியது.. பெல்ட் மன்னன் எனப்பட்ட கொடியவனைத் திருமணம் செய்து கொள்வதிலிருந்து தப்பிக்க வயநாட்டுக்கு ஓடி அடைக்கலம் புகுந்தால் அங்கே  கம்மாண்டர் அவளை மயக்கித் தொலைக்கிறான்.. அவன் மீதான மயக்கத்திலிருந்து விடுபட முடியாமல் தத்தளித்த பேதையிடம் காதலைச் சொல்லி அவள் மனதை அலைக்கழிக்கிறான்.. ஒரு வழியாக அவன் மீதான காதலை அவள் ஒப்புக் கொண்ட சில நாள்களில் அவன்தான் பெல்ட் மன்னன் என்று அவனுடைய அத்தை மகளும், அத்தை மகனும் சொல்கிறார்கள்.. உனக்கு என்னை முன்னரே தெரியுமா..? உன் அம்மாவும், தங்கையும் என்னைப் பெண் கேட்டு வந்தார்களா என்ற கேள்விக்கு அவன் 'ஆமாம்' என்று பதில் சொல்கிறான்.. அவளிடமிருந்து உண்மையை மறைத்ததை ஒப்புக் கொள்கிறான்.. மனம் வெறுத்துப் போய் அவனிடமிருந்து பிரிந்து ஓடினால் வழியில் அவளை ஒருவன் கடத்துகிறான்.. கடத்துகிறவன் சொல்கிறான்.. அவன்தான் 'பெல்ட் மன்னன்..' என்று..
'இது சிந்தாநதிச் சுழலைவிடத் திணற வைக்கும் சுழல்..!'
திக்குத் தெரியாத கானகத்தில் மாட்டி விட்டதைப் போல இருந்தது நந்தினிக்கு.. அடர்ந்த இருளில் வெளிச்சப் புள்ளியைத் தேடித் தேடிக் களைத்துப் போனாள்.. அவளைச் சுற்றி என்ன நடக்கிறது என்று தெரியாமல் திகைத்துப் போனாள்..
'இவன் தான் பெல்ட் மன்னன் என்றால் கம்மாண்டர் ஏன் அப்படிச் சொன்னான்..? அத்தையும், ரம்யாவும் அவனுக்காக நந்தினியைப் பெண் கேட்டார்கள் என்பதை ஒப்புக் கொண்டானே..'
ரவிச்சந்திரன் பொய் சொல்ல மாட்டான்.. இதில் நந்தினிக்கு மாற்றுக் கருத்தில்லை.. அவளிடமிருந்து உண்மையைத்hன் அவன் மறைத்தான்.. பொய் சொல்லவில்லை.. அதை அவனிடம் நேரடியாகக் கேட்டபோது ஆமாம், நான் உண்மையை மறைத்தேன் தான்.. அதனால் என்ன வந்து விட்டது..? உனக்கு என்மீது காதலில்லையா என்று கோபப்பட்டானே தவிர பொய் சொல்லி மழுப்பவில்லை..
ரவிச்சந்திரன் நேரிடையாக யுத்தம் புரிபவன்.. முதுகில் குத்திப் பெறும் வெற்றிகளில் விருப்ப மில்லாதவன்.. நந்தினியைப் பணிய வைக்க மயக்க மருந்து கொடுத்து அவளைக் கடத்த நினைக்கவில்லை.. மயக்கி காதல் புரியத்தான் நினைத்தான்.. நினைத்ததை நடத்தி முடித்து விட்டான்..
மகேந்திரன் அப்படியில்லையே.. நேர்வழியை விரும்பாத அயோக்கிய சிகாமணியாக பெண்ணைக் கடத்துகிறானே.. யார் இவன்..? இவன்தான் பெல்ட் மன்னன் என்றால் கம்மாண்டர் யார்..?
ரவிச்சந்திரன், மகேந்திரன்.. இருவரில் யார்தான் பெல்ட் மன்னன்..?


Name

அகல்விளக்கு,24,அக்கினிப் பறவை.,32,அடுத்தடுத்து,1,அம்மம்மா.. கேளடி தோழி...!,130,அழகான ராட்சசியே,103,இதயத்தின் சாளரம்,31,இது நீரோடு செல்கின்ற ஓடம்...,103,உயிரே உனைத் தேடி ...,34,உயிர்தேனே..! உன்னாலே.. உயிர்த்தேனே..,33,உன்னோடு நான்,25,ஊமையின் ராகம்,32,எங்கிருந்தோ ஆசைகள்...,47,எண்ணியிருந்தது ஈடேற,249,என்னவென்று நான் சொல்ல ?,1,ஏதோ ஒரு நதியில்...,33,கடாவெட்டு,1,கல்யாணமாம் கல்யாணம்,1,காற்றோடு தூது விட்டேன்,26,கானல்வரிக் கவிதை,46,கோமதியின் கோபம்,1,சங்கமித்த நெஞ்சம்,40,சொல்லத்தான் நினைக்கிறேன்,24,சொல்லாமலே பூப்பூத்ததே ..,35,தஞ்சமென வந்தவளே,33,தென்னம்பாளை,1,தேரில் வந்த திருமகள் ..!,9,தேரில் வந்த திருமகள்..!,16,தொடுவானம்,18,நதியோரம்,34,நதியோரம் நடந்தபோது,24,நிலாவெளியில்,17,நிழல் ஆட்ட யுத்தம்,1,நெஞ்சமடி நெஞ்சம்,34,பனித்திரை,29,புதிதாக ஒரு பூபாளம்..,34,புலர்கின்ற பொழுதில்,15,பூமிக்கு வந்த நிலவு,32,பூவே மயங்காதே,33,மகராசி,3,மழைச்சாரலாய் மனம் நனைத்தாய்...,32,முகங்கள் -part -II,5,முகில் மறைத்த நிலவு.,41,மூரத்தியின் பக்கங்கள்,11,யார் அந்த நிலவு ?,33,ராக்கெட்,1,வாங்க பேசலாம்,9,விண்ணைத்தாண்டி வந்தாயே..!,9,ஜனனி... ஜெகம் நீ..,5,
ltr
item
Muthulakshmi Raghavan Novels: எண்ணியிருந்தது ஈடேற... 239
எண்ணியிருந்தது ஈடேற... 239
https://1.bp.blogspot.com/-Ru6KiNUnm88/XUe2y54LpAI/AAAAAAAAArU/sz3RLdc7PQYg1ApQA3-vfOKHPEIX2U1MQCPcBGAYYCw/s320/8_Part%2B-%2B2.jpg
https://1.bp.blogspot.com/-Ru6KiNUnm88/XUe2y54LpAI/AAAAAAAAArU/sz3RLdc7PQYg1ApQA3-vfOKHPEIX2U1MQCPcBGAYYCw/s72-c/8_Part%2B-%2B2.jpg
Muthulakshmi Raghavan Novels
https://www.muthulakshmiraghavannovels.com/2020/03/enniyirunthathueedera-239.html
https://www.muthulakshmiraghavannovels.com/
https://www.muthulakshmiraghavannovels.com/
https://www.muthulakshmiraghavannovels.com/2020/03/enniyirunthathueedera-239.html
true
5064978942293848112
UTF-8
Loaded All Posts Not found any posts VIEW ALL Readmore Reply Cancel reply Delete By Home PAGES POSTS View All RECOMMENDED FOR YOU LABEL ARCHIVE SEARCH ALL POSTS Not found any post match with your request Back Home Sunday Monday Tuesday Wednesday Thursday Friday Saturday Sun Mon Tue Wed Thu Fri Sat January February March April May June July August September October November December Jan Feb Mar Apr May Jun Jul Aug Sep Oct Nov Dec just now 1 minute ago $$1$$ minutes ago 1 hour ago $$1$$ hours ago Yesterday $$1$$ days ago $$1$$ weeks ago more than 5 weeks ago Followers Follow THIS PREMIUM CONTENT IS LOCKED STEP 1: Share. STEP 2: Click the link you shared to unlock Copy All Code Select All Code All codes were copied to your clipboard Can not copy the codes / texts, please press [CTRL]+[C] (or CMD+C with Mac) to copy